Daag Dehlvi

aafat kii shoKhiyaa.N hai.n tumhaarii nigaah me.n
mehashar ke fitane khelate hai.n jalwa-gaah me.n 

wo dushmanii se dekhate hai.n dekhate to hai.n
mai.n shaad huu.N ke huu.N to kisii kii nigaah me.n 

aatii baat baat mujhe yaad baar baar
kahataa huu.N dau.D dau.D ke qaasid se raah me.n 

is taubaah par hai naaz mujhe zaahid is qadar
jo TuuT kar shariik huu.N haal-e-tabaah me.n 

mushtaaq is adaa ke bahot dard-ma.nd the
ae DaaG tum to baiTh gaye ek aah me.n

@@@@@@@@@@@@@@@@@@@@@@@@@@@@@@@@@@@@@@@@@@@

aarazuu hai vafaa kare ko_ii
jii na chaahe to kyaa kare ko_ii 

gar marz ho davaa kare ko_ii
marane vaale kaa kyaa kare ko_ii 

koste hai.n jale hue kyaa kyaa
apane haq me.n duaa kare ko_ii 

un se sab apanii apanii kahate hai.n
meraa matalab adaa kare ko_ii 

tum saraapaa ho suurat-e-tasviir
tum se phir baat kyaa kare ko_ii 

jis me.n laakho.n baras kii huure.n ho.n
aisii jannat ko kyaa kare ko_ii

@@@@@@@@@@@@@@@@@@@@@@@@@@@@@@@@@@@@@@@@@@@

ajab apanaa haal hotaa jo visaal-e-yaar hotaa
kabhii jaan sadaqe hotii kabhii dil nisaar hotaa 

na mazaa hai dushmanii me.n na hai lutf dostii me.n
koii Gair Gair hotaa koii yaar yaar hotaa 

ye mazaa thaa dillagii kaa ke baraabar aag lagatii
na tumhe.n qaraar hotaa na hame.n qaraar hotaa 

tere waade par sitamagar abhii aur sabr karate
agar apanii zindagii kaa hame.n aitabaar hotaa

@@@@@@@@@@@@@@@@@@@@@@@@@@@@@@@@@@@@@@@@@@@

butaan-e-maahavash uja.Dii hu_ii ma.nzil me.n rahate hai.n
ke jis kii jaan jaatii hai usii ke dil me.n rahate hai.n 

hazaaro.n hasarate.n vo hai.n ki roke se nahii.n rukatii.n
bahot armaan aise hai.n ki dil ke dil me.n rahate hai.n 

Khudaa rakkhe muhabbat ke liye aabaad dono.n ghar
mai.n un ke dil me.n rahataa huu.N vo mere dil me.n rahate hai.n 

zamii.n par paa.Nv nakhvat se nahii.n rakhate parii-paikar
ye goyaa is makaa.N kii duusarii ma.nzil me.n rahate hai.n 

ko_ii naam-o-nishaa.N puuchhe to ai qaasid bataa denaa
taKhallus "Daag" hai aur aashiqo.n ke dil me.n rahate hai.n

@@@@@@@@@@@@@@@@@@@@@@@@@@@@@@@@@@@@@@@@@@@

Darate hai.n chashm-o-zulf, nigaah-o-adaa se ham
har dam panaah maa.Ngate hai.n har balaa se ham 

maashuuq jaaye huur mile, may bajaaye aab
mahashar me.n do savaal kare.nge Khudaa se ham 

go haal-e-dil chhupaate hai.n par is ko kyaa kare.n
aate hai.n Khud Khud nazar ik mubatalaa se ham 

dekhe.n to pahale kaun miTe usakii raah me.n
baiThe hai.n shart baa.ndh ke har naqsh-e-paa se ham

@@@@@@@@@@@@@@@@@@@@@@@@@@@@@@@@@@@@@@@@@@@

dil gayaa tum ne liyaa ham kyaa kare.n
jaanevaalii chiiz kaa Gam kyaa kare.n 

puure ho.nge apane armaa.N kis tarah
shauq behad waqt hai kam kyaa kare.n 

baksh de.n pyaar kii gustaaKhiyaa.N
dil hii qabuu me.n nahii.n, ham kyaa kare.n 

tu.nd khuu hai kab sune vo dil kii baat
aur bhii baraham ko baraham kyaa kare.n 

ek saaGar par hai apanii zi.ndaagii
raftaa raftaa is se bhii kam kyaa kare.n 

kar chuke sab apanii-apanii hikamate.n
dam nikalataa hai ai mere hamadam kyaa kare.n 

dil ne siikhaa shevaa-e-begaanagii
aise naamuharim ko muharim kyaa kare.n 

maamalaa hai aaj husn-o-ishq kaa
dekhiye vo kyaa kare.n ham kyaa kare.n 

kah rahe hai.n ahal-e-sifaarish mujhase "Daag"
terii qismat hai burii ham kyaa kare.n

@@@@@@@@@@@@@@@@@@@@@@@@@@@@@@@@@@@@@@@@@@@

dil ko kyaa ho gayaa Khudaa jaane
kyo.n hai aisaa udaas kyaa jaane 

kah diyaa mai.n ne haal-e-dil apanaa
is ko tum jaano yaa Khudaa jaane

jaanate jaanate hii jaanegaa
mujh me.n kyaa hai abhii wo kyaa jaane 

tum na paaoge saadaa dil mujhasaa
jo taGaaful ko bhoi hayaa jaane

@@@@@@@@@@@@@@@@@@@@@@@@@@@@@@@@@@@@@@@@@@@

Gam se kahii.n najaat mile chain paaye.N ham
dil Khuun me.n nahaa_e to ga.ngaa nahaaye.N ham 

jannat me.n jaaye.N ham ki jahannum me.n jaaye.N ham
mil jaa_e tuu kahii.n na kahii.n tujh ko paaye.N ham 

mumkin hai ye ki vaade pe apane vo aa bhii jaa_e
mushkil ye hai ki aap me.n us vaqt aaye.N ham 

naraaz ho Khudaa to kare.n ba.ndagii se Khush
maashuuq ruuTh jaa_e to kyo.n kar manaaye.N ham 

sar dosto.n ke kaaT kar rakkhe hai.n saamane
Gairo.n se puuchhate hai.n qasam kis kii khaaye.N ham 

sau.npaa tumhe.n Khudaa ko chale ham to naamuraad
kuchh pa.Dh ke baKhshanaa jo kabhii yaad aaye.N ham 

ye jaan tum na loge agar aap jaayegii
is bevafaa kii Khair kahaa.N tak manaaye.N ham 

ham-saaye jaagate rahe naalo.n se raat bhar
soye huye nasiib ko kyo.n kar jagaaye.N ham

tuu bhuulane kii chiiz nahii.n Khuub yaad rakh
ai "Daag" kis tarah tujhe dil se bhulaaye.N ham

@@@@@@@@@@@@@@@@@@@@@@@@@@@@@@@@@@@@@@@@@@@

Gazab kiyaa, tere vaade pe aitabaar kiyaa
tamaam raat qayaamat kaa i.ntezaar kiyaa 

ha.Nsaa ha.Nsaa ke shab-e-vasl ashk-baar kiyaa
tasalliyaa.N mujhe de-de ke beqaraar kiyaa 

ham aise mahv-e-nazaaraa na the jo hosh aataa
magar tumhaare taGaaful ne hoshiyaar kiyaa 

fasaana-e-shab-e-Gam un ko ek kahaanii thhii
kuchh aitabaar kiyaa aur kuchh naa-aitabaar kiyaa 

ye kisane jalvaa hamaare sar-e-mazaar kiyaa
ki dil se shor uThaa, haa_e! beqaraar kiyaa

ta.Dap phir ai dil-e-naadaa.N, ki Gair kahate hai.n
aaKhir kuchh na banii, sabr iKhtiyaar kiyaa 

bhulaa bhulaa ke jataayaa hai unako raaz-e-nihaa.N
chhipaa chhipaa ke mohabbat ko aashakaar kiyaa 

tumhe.n to vaadaa-e-diidaar ham se karanaa thaa
ye kyaa kiyaa ke jahaa.N ko ummiidavaar kiyaa 

ye dil ko taab kahaa.N hai ke ho maalandesh
u.nho.ne vaadaa kiyaa ham ne aitabaar kiyaa 

na puuchh dil kii haqiiqat magar ye kahate hai.n
vo beqaraar rahe jisane beqaraar kiyaa 

kuchh aage daavar-e-mahashar se hai ummiid mujhe
kuchh aap ne mere kahane kaa aitabaar kiyaa

@@@@@@@@@@@@@@@@@@@@@@@@@@@@@@@@@@@@@@@@@@@

har baar maa.Ngatii hai nayaa chashm-e-yaar dil
ik dil ke kis tarah se banaauu.N hazaar dil 

puuchhaa jo us ne taalib-e-roz-e-jazaa hai kaun
nikalaa merii zabaan se be-iKhtiyaar dil 

karate ho ahad-e-vasl to itanaa rahe Khayaal
paimaan se zyaadaa hai naapaayadaar dil 

us ne kahaa hai sabr pa.Degaa raqiib kaa
le aur beqaraar huaa ai beqaraar dil

@@@@@@@@@@@@@@@@@@@@@@@@@@@@@@@@@@@@@@@@@@@

is adaa se vo vafaa karate hai.n
ko_ii jaane ke vafaa karate hai.n 

hamako chho.Doge to pachhataaoge
ha.NSanae vaalo.n se ha.Nsaa karate hai.n 

ye bataataa nahii.n ko_ii mujhako
dil jo aa jaaye to kyaa karate hai.n 

husn kaa haq nahii.n rahataa baaqii
har adaa me.n vo adaa karate hai.n 

kis qadar hai.n terii aa.Nkhe.n bebaak
in se fitne bhii hayaa karate hai.n 

is liye dil ko lagaa rakkhaa hai
is me.n dil ko lagaa rakkhaa hai 

"Daag" tuu dekh to kyaa hotaa hai
jabr par jabr kiyaa karate hai.n

@@@@@@@@@@@@@@@@@@@@@@@@@@@@@@@@@@@@@@@@@@@

kaabe kii hai havas kabhii kuu-e-butaa.N kii hai
mujh ko Khabar nahii.n merii miTTii kahaa.N kii hai 

kuchh taazagii ho lazzat-e-aazaar ke liye
har dam mujhe talaash naye aasamaa.N kii hai 

hasarat baras rahii hai mere mazaar se
kahate hai.n sab ye qabr kisii naujavaa.N kii hai 

qaasid kii guftaguu se tasallii ho kis tarah
chhipatii nahii.n vo jo terii zabaa.N kii hai 

sun kar meraa fasaanaa-e-Gam us ne ye kahaa
ho jaaye jhuuT sach, yahii Khuubii bayaa.N kii hai 

kyuu.N kar na aa_e Khuld se aadam zamiin par
mauzuu.N vahii.n vo Khuub hai, jo shay jahaa.N kii hai 

urduu hai jisakaa naam hamii.n jaanate hai.n ‘Daag’
hindustaa.N me.n dhuum hamaarii zabaa.N kii hai

@@@@@@@@@@@@@@@@@@@@@@@@@@@@@@@@@@@@@@@@@@@

Khaatir se yaa lihaaz se mai.n maan to gayaa
jhuuThii qasam se aap kaa imaan to gayaa 

dil leke muft kahate hai.n kuchh kaam kaa nahii.n
ulaTii shikayate.n rahii ehasaan to gayaa 

ab shaay-e-raaz-e-ishq go zillate.n hu_ii
lekin use jataa to diyaa, jaan to gayaa 

dekhaa hai butakade me.n jo ai sheKh kuchh na kuchh
iimaan kii to ye hai ki iimaan to gayaa 

Darataa huu.N dekh kar dil-e-be-aarazuu ko mai.n
sun-saan ghar ye kyuu.N na ho mehamaan to gayaa 

go naamaabar se Khush na huaa par hazaar shukr
mujh ko vo mere naam se pahachaan to gayaa 

hosh-o-havaas-o-taab-o-tavaa.N "Daag" jaa chuke
ab ham bhii jaane vaale hai.n saamaan to gayaa

@@@@@@@@@@@@@@@@@@@@@@@@@@@@@@@@@@@@@@@@@@@

le chalaa jaan merii ruuTh ke jaanaa teraa

aise aane se to behatar thaa na aanaa teraa

apane dil ko bhii bataa_uu.N na Thikaanaa teraa

sab ne jaanaa jo pataa ek ne jaanaa teraa

tuu jo ai zulf pareshaan rahaa karatii hai

kis ke uja.De hue dil me.n hai Thikaanaa teraa

ye samajh kar tujhe ai maut lagaa rakhaa hai

kaam aataa hai bure vaqt me.n aanaa teraa

apanii aa.Nkho.n me.n bhii kau.Ndh ga_ii bijalii sii

ham na samajhe ki ye aanaa hai ki jaanaa teraa

'Daag' ko yuu.N vo miTaate hai.n ye farmaate hai.n

tuu badal Daal huaa naam puraanaa teraa

@@@@@@@@@@@@@@@@@@@@@@@@@@@@@@@@@@@@@@@@@@@

lutf vo ishq me.n paaye hai.n ki jii jaanataa hai
ra.nj bhii itane uThaaye hai.n kio jii jaanataa hai 

jo zamaane ke sitam hai.n vo zamaanaa jaane
tuune dil itane dukhaaye hai.n ki jii jaanataa hai 

tum nahii.n jaanate ab tak ye tumhaare a.ndaaz
vo mere dil me.n samaaye hai.n ki jii jaanataa hai 

i.nhii.n qadamo.n ne tumhaare i.nhii.n qadamo.n kii qasam
Khaak me.n itane milaaye hai.n ki jii jaanataa hai 

dostii me.n terii darapardaa hamaare dushman
is qadar apane paraaye hai.n ki jii jaanataa hai

@@@@@@@@@@@@@@@@@@@@@@@@@@@@@@@@@@@@@@@@@@@

mere qaabuu me.n na peharo.n dil-e-naashaad aayaa

vo meraa bhuulane vaalaa jo mujhe yaad aayaa

dil-e-viiraa.N se raqiibo.n ne muraade.n paa_ii.n

kaam kis kis ke meraa Khirman-e-barbaad aayaa

liijiye suniye ab afasaanaa-e-furqat mujh se

aap ne yaad dilaayaa to mujhe yaad aayaa

dii mu'azzin ne azaa.N vasl kii shab pichhale pahar

haaye kam_baKht ko kis vaqt Khudaa yaad aayaa

bazm me.n un ke sabhii kuchh hai magar "Daag" nahii.n

mujh ko vo Khaanaa-Kharaab aaj bahut yaad aayaa

@@@@@@@@@@@@@@@@@@@@@@@@@@@@@@@@@@@@@@@@@@@

muhabbat me.n kare kyaa kuchh kisii se ho nahii.n sakataa
meraa maranaa bhii to merii Khushi se ho nahii.n sakataa 

na ronaa hai tariiqe kaa na ha.Nsanaa hai saliiqe kaa
pareshaanii me.n ko_ii kaam jii se ho nahii.n sakataa 

Khudaa jab dost hai ai "Daag" kyaa dushman se a.ndeshaa
hamaaraa kuchh kisii kii dushmanii se ho nahii.n sakataa

@@@@@@@@@@@@@@@@@@@@@@@@@@@@@@@@@@@@@@@@@@@

na jaao haal-e-dil-e-zaar dekhate jaao
ki jii na chaahe to naachaar dekhate jaao 

bahaar-e-umr me.n baaG-e-jahaa.N kii sair karo
khilaa huaa hai ye gulazaar dekhate jaao 

uThao aa.Nkh na sharmaao ye to mahafil hai
Gazab se jaanib-e-aGayaar dekhate jaao 

huaa hai kyaa abhii ha.ngaamaa abhii kuchh hogaa
fugaa.N me.n hashr ke aasaar dekhate jaao 

tumhaarii aa.nkh mere dil se besabab-bevajah
hu_ii hai la.Dane ko tayyaar dekhate jaao 

na jaao ba.nd kiye aa.Nkh raharavaan-e-adam
idhar-udhar bhii Khabaradaar dekhate jaao 

ko_ii na ko_ii har ik sher me.n hai baat zaruur
janaab-e-"Daag" ke ashaar dekhate jaao

@@@@@@@@@@@@@@@@@@@@@@@@@@@@@@@@@@@@@@@@@@@

na ravaa kahiye na sazaa kahiye

kahiye kahiye mujhe buraa kahiye

dil me.n rakhane kii baat hai Gam-e-ishq

is ko hargiz na barmalaa kahiye

vi mujhe qatl kar ke kahate hai.n

maanataa hii na thaa ye kyaa kahiye

aa ga_ii aap ko masihaa_ii

marane vaalo ko marhabaa kahiye

hosh u.Dane lage raqiibo.n ke

"Daag" ko aur bevafaa kahiye

@@@@@@@@@@@@@@@@@@@@@@@@@@@@@@@@@@@@@@@@@@@

parde parde me.n aataab achchhe nahii.n
aise a.ndaaz-e-hijaab achchhe nahii.n 

mayakade me.n ho gaye chup-chaap kyo.n
aaj kuchh mast-e-sharaab achchhe nahii.n 

ai falak kyaa hai zamaane kii bisaat
dam-ba-dam ke i.nqalaab achchhe nahii.n 

bazm-e-vaa_iz be-sharaan achchhe nahii.n
aise jalase be-sharaab achchhe nahii.n 

taubaa kar le.n ham may-o-maashuuq se
be-mazaa hai.n ye savaab achchhe nahii.n 

ik najuumii "Daag" se kahataa thaa aaj
aap ke din ai janaab achchhe nahii.n

@@@@@@@@@@@@@@@@@@@@@@@@@@@@@@@@@@@@@@@@@@@

phir shab-e-Gam ne mujhe shakl dikhaa_ii kyo.nkar

ye balaa ghar se nikaalii hu_ii aa_ii kyo.nkar

tuu ne kii Gair se merii buraa_ii kyo.nkar

gar na thii dil me.n to lab par tere aa_ii kyo.nkar

tum dilaazaar-o-sitam_gar nahii.n mai.n ne maanaa

maan jaayegii ise saarii Khudaa_ii kyo.nkar

aa_iinaa dekh ke vo kahane lage aap hii aap

aise achchho.n kii kare ko_ii buraa_ii kyo.nkar

kasarat-e-ranj-o-alam sun ke ye ilzaam milaa

itane se dil me.n hai itano.n kii samaa_ii kyo.nkar

daaG kal tak to du_aa aap kii maqabuul na thii

aaj muu.Nh maa.Ngii muraad aap ne paa_ii kyo.nkar

@@@@@@@@@@@@@@@@@@@@@@@@@@@@@@@@@@@@@@@@@@@

phire raah se vo yahaa.N aate aate
ajal merii rahii tuu kahaa.N aate aate 

mujhe yaad karane se ye muddaa thaa
nikal jaaye dam hichakiyaa.N aate aate 

kalejaa mere muu.Nh ko aayegaa ik din
yuu.N hii lab pe aah-o-fuuGaN aate aate

natiijaa na nikalaa thake sab payaamii
vahaa.N jaate jaate yahaa.N aate aate 

nahii.n khel ai "Daag" yaaro.n se kah do
ke aatii hai urduu zubaa.N aate aate

@@@@@@@@@@@@@@@@@@@@@@@@@@@@@@@@@@@@@@@@@@@

pukaaratii hai Khaamoshii merii fugaa.N kii tarah
nigaahe.n kahataii hai.n sab raaz-e-dil zubaa.N kii tarah 

jalaa ke daaG-e-muhabbat ne dil ko Khaak kiyaa
bahaar aa_ii mere baaG me.n Khizaa.N kii tarah 

talaash-e-yaar me.n chho.Dii na sar-zamii.n ko_ii
hamaare paa.Nv me.n chakkar hai.n aasmaa.N kii tarah 

adaa-e-matlab-e-dil hamase siikh jaaye ko_ii
u.nhe.n sunaa hii diyaa haal daastaa.n kii tarah

@@@@@@@@@@@@@@@@@@@@@@@@@@@@@@@@@@@@@@@@@@@

ranj kii jab guftaguu hone lagii
aap se tum tum se tuu hone lagii 

chaahiye paiGaamabar dono taraf
lutf kyaa jab duu-ba-duu hone lagii 

merii rusawaaii kii naubat aa gaii
unakii shoharat quu-ba-quu hone lagii 

naazir ba.D gaii hai is qadar
aarazuu kii aarazuu hone lagii 

ab to mil kar dekhiye kyaa rang ho
phir hamaarii justajuu hone lagii 

'DaaG' itaraaye hue phirate hai.n aap
shaayad unakii aabaruu hone lagii

@@@@@@@@@@@@@@@@@@@@@@@@@@@@@@@@@@@@@@@@@@@

rasm-e-ulfat sikhaa gayaa ko_ii
dil kii duniyaa pe chhaa gayaa ko_ii 

taa qayaamat kisii tarah na bujhe
aag aisii lagaa gayaa ko_ii 

dil kii duniyaa ujaa.D sii kyuu.N hai
kyaa yahaa.N se chalaa gayaa ko_ii 

vaqt-e-ruKhsat gale lagaa kar "Daag"
ha.Nsate ha.Nsate rulaa gayaa ko_ii

@@@@@@@@@@@@@@@@@@@@@@@@@@@@@@@@@@@@@@@@@@@

sitam hii karanaa jafaa hii karanaa nigaah-e-lutf kabhii na karanaa
tumhe.n qasam hai hamaare sar kii hamaare haq me.n kamii na karanaa 

kahaa.N kaa aanaa kahaa.N kaa jaanaa vo jaante hii nahii.n ye rasme.n
vahaa.N hai vaade kii bhii ye suurat kabhii to karanaa kabhii na karanaa 

hamaarii mayyat pe tum jo aanaa to chaar aa.Nsuu bahaa ke jaanaa
zaraa rahe paas-e-aabaruu bhii kahii.n hamaarii ha.Nsii na karanaa 

vo ik hamaaraa tariiq-e-ulfat ki dushmano.n se bhii mil ke chalanaa
ye ek shevaa teraa sitamagar ki dost se dostii na karanaa

@@@@@@@@@@@@@@@@@@@@@@@@@@@@@@@@@@@@@@@@@@@

tumhaare Khat me.n nayaa ik salaam kis kaa thaa
na thaa raqiib to aaKhir vo naam kis kaa thaa 

vo qatl kar ke har kisii se puuchhate hai.n
ye kaam kis ne kiyaa hai ye kaam kis kaa thaa 

vafaa kare.nge nibhaaye.nge baat maane.nge
tumhe.n bhii yaad hai kuchh ye kalaam kis kaa thaa 

rahaa na dil me.n vo be-dard aur dard rahaa
muqiim kaun huaa hai maqaam kis kaa thaa 

na puuchh-paachh thii kisii kii na aav-bhagat
tumhaarii bazm me.n kal ehatamaam kis kaa thaa 

hamaare Khat ke to purze kiye pa.Dhaa bhii nahii.n
sun jo tum ne baa-dil vo payaam kis kaa thaa 

i.nhii.n sifaat se hotaa hai aadamii mashahuur
jo lutf aap hii karate to naam kis kaa thaa 

guzar gayaa vo zamaanaa kahe.n to kis se kahe.n
Khayaal mere dil ko subah-o-shaam kis kaa thaa 

har ek se kahate hai.n kyaa "Daag" bevafaa nikalaa
ye puuchhe in se ko_ii vo Gulaam kis kaa thaa

@@@@@@@@@@@@@@@@@@@@@@@@@@@@@@@@@@@@@@@@@@@

unake ek jaa.N-nisaar ham bhii hai.n
hai.n jahaa.N sau-hazaar ham bhii hai.n 

tum bhii bechain ham bhii hai.n bechain
tum bhii ho beqaraar ham bhii hai.n 

ai falaq kah to kyaa iraadaa hai
aish ke Khvaastagaar ham bhii hai.n 

shahar khaalii kiye dukaa.N kaisii
ek hii vaadaa-Khvaar ham bhii hai.n 

sharm samajhe tere TaGaaful ko
vaah! kyaa hoshiyaar ham bhii hai.n 

tum agar apanii Khuu ke ho maashuuq
apane matalab ke yaar ham bhii hai.n 

jis ne chaahaa pha.Nsaa liyaa hamako
dil-baro.n ke shikaar ham bhii hai.n 

kaun saa dil hai jis me.n daaG nahii.n
ishq kii yaadagaar ham bhii hai.n

@@@@@@@@@@@@@@@@@@@@@@@@@@@@@@@@@@@@@@@@@@@

uzr aane me.n bhii hai aur bulaate bhii nahii.n
baais-e-tark-e-mulaaqaat bataate bhii nahii.n 

Khuub pardaa hai ke chilaman se lage baiThe hai.n
saaf chhupate bhii nahii.n saamane aate bhii nahii.n 

ho chukaa qata ta'lluq to jafaaye.n kyo.n ho.n
jinako matalab nahii.n rahataa wo sataate bhii nahii.n 

 

ziist se ta.ng ho ae DaaG to jiite kyo.n ho
jaan pyaarii bhii nahii.n jaan se jaate bhii nahii.n

@@@@@@@@@@@@@@@@@@@@@@@@@@@@@@@@@@@@@@@@@@@

ye jo hai hukm mere paas na aaye ko_ii
is liye ruuTh rahe hai.n ki manaaye ko_ii 

taak me.n hai nigah-e-shauq Khudaa Khair kare
saamane se mere bachataa huaa jaaye ko_ii 

haal afalaaq-o-zamii.n kaa jo bataayaa bhii to kyaa
baat vo hai jo tere dil kii baataaye ko_ii 

aapane 'Daag' ko muu.Nh bhii na lagaayaa afsos
us ko rakhataa thaa kaleje se lagaaye ko_ii 

ho chukaa aish kaa jalasaa to mujhe Khat bhejaa
aap kii tarah se mehamaan bulaaye ko_ii

@@@@@@@@@@@@@@@@@@@@@@@@@@@@@@@@@@@@@@@@@@@