ai maut! unhe.n bhulaaye zamaane guzar gaye
aa jaa ki zahar khaaye zamaane guzar gaye
O jaane vaale aa ki tere intazaar me.n
raste ko ghar banaaye zamaane guzar gaye
Gam hai na ab Khushii hai na ummiid hai na yaas
sab se najaat paaye zamaane guzar gaye
kyaa laayaq-e-sitam bhii nahii.n ab mai.n dosto.n
patthar bhii ghar me.n aaye zamaane guzar gaye
jaane bahaar phuul nahii.n aadamii huu.N mai.n
aa jaa ki muskuraaye zamaane guzar gaye
kyaa kyaa tavaqqo_at thii aaho.n se ai 'Khumar'
ye tiir bhii chalaaye zamaane guzar gaye
@@@@@@@@@@@@@@@@@@@@@@@@@@@@@@@@@@@@@@@@@@@
aisaa nahii.n ki un se mohabbat nahii.n rahii
jazbaat me.n vo pahalii sii shiddat nahii.n rahii
sar me.n vo intazaar kaa saudaa nahii.n rahaa
dil par vo dha.Dakano.n kii hukuumat nahii.n rahii
paiham tavaaf-e-kuuchaa-e-jaanaa ke din gaye
pairo.n me.n chalane phirane kii taaqat nahii.n rahii
chehare kii jhurriyo.n ne bhayaanak banaa diyaa
aa_iinaa dekhane kii bhii himmat nahii.n rahii
kam_zorii-e-nigaah ne sanjiidaa kar diya
jalvo.n se chhe.D-chhaa.D kii aadat nahii.n rahii
allaah jaane maut kahaa.N mar ga_ii 'Khumar'
ab mujh ko zindagii kii zaruurat nahii.n rahii
@@@@@@@@@@@@@@@@@@@@@@@@@@@@@@@@@@@@@@@@@@@
bujh gayaa dil hayaat baaqii hai
chhup gayaa chaa.Nd raat baaqii hai
hal-e-dil un se kah chuke sau baar
ab bhii kahane kii baat baaqii hai
raat baaqii thii jab vo bichha.De the
kaT ga_ii umr raat baaqii hai
ishq me.n ham nibhaa chuke sab se ai 'Khumar'
bas ek zaalim hayaat baaqii hai
@@@@@@@@@@@@@@@@@@@@@@@@@@@@@@@@@@@@@@@@@@@
durii ke Gam kuchh aur sivaa ho ke rah gaye
ham un se kyaa mile ke judaa ho ke rah gaye
khoye hue the der se vo merii yaad me.n
mujh par nazar pa.Dii to Khafaa ho ke rah gaye
phir dosto.n ko mai.n ne pai mashq de diye
jo tiir mujh tak aaye Khataa ho ke rah gaye
majabuur ho ke maa.Ngii thii lutf-o-karam kii bhiik
lutf-o-karam bhii jor-o-jafaa ho ke rah gaye
ab kyaa rahaa tere liye ai ishq naamuraad
ab vo bhii mubtilaa-e-vafaa ho ke rah gaye
allaah aa_iinaa to kabhii dekh lo 'Khumaar'
tum kyaa the aur ishq me.n kyaa ho ke rah gaye
@@@@@@@@@@@@@@@@@@@@@@@@@@@@@@@@@@@@@@@@@@@
ek pal me.n ek sadii kaa mazaa ham se puuchhiye
do din kii zindagii kaa mazaa ham se puuchhiye
bhuule hai.n unhe.n raftaa raftaa mudatto.n me.n ham
qishto.n me.n Khud_kushii kaa mazaa ham se puuchhiye
aaGaaz-e-aashiqii kaa mazaa aap jaaniye
anjaam-e-aashiqii kaa mazaa ham se puuchhiye
jalate diyo.n me.n jalate gharo.n jaise zau kahaa.N
sarakar raushnii kaa mazaa ham se puuchhiye
vo jaan hii gaye ke hame.n un se pyaar hai
aa.Nkho.n kii muKhbarii kaa mazaa ham se puuchhiye
ha.Nsane kaa shauq ham ko bhii thaa aap kii tarah
ha.Nsiye magar ha.Nsii kaa mazaa ham se puuchhiye
ham taubaa kar ke mar gaye bemaut ai 'Khumar'
tauhiin-e-maikashii kaa mazaa ham se puuchhiye
@@@@@@@@@@@@@@@@@@@@@@@@@@@@@@@@@@@@@@@@@@@
haal-e-Gam un ko sunaate jaayiye
shart ye hai ke muskuraate jaayiye
aap ko jaate na dekhaa jaayegaa
shammaa ko pahale bujhaate jaayiye
shukriyaa lutf-e-musal_sal kaa magar
gaahe gaahe dil ko dukhaate jaayiye
dushmano.n se pyaar hotaa jaayegaa
dosto.n ko aazamaate jaayiye
raushnii mahaduud ho jin kii 'Khumaar'
un charaaGo.n ko bujhaate jaayiye
@@@@@@@@@@@@@@@@@@@@@@@@@@@@@@@@@@@@@@@@@@@
ham unhe.n vo hame.n bhulaa baiThe
do gunah_gaar zahar khaa baiThe
haal-e-Gam kah kah ke Gam ba.Dhaa baiThe
tiir maare the tiir khaa baiThe
aa.Ndhiyo.n jaao ab aaraam karo
ham Khud apanaaa diyaa bujhaa baiThe
jii to halkaa huaa magar yaaro
ro ke ham lutf-e-Gam ba.Dhaa baiThe
besahaaro.n kaa hausalaa hii kyaa
ghar me.n ghabaraaye dar pe aa baiThe
jab se bichha.De vo muskuraaye na ham
sab ne chhe.Daa to lab hilaa baiThe
ham rahe mubtalaa-e-dair-o-haram
vo dabe paao.N dil me.n aa baiThe
uTh ke ik bevafaa ne de dii jaan
rah gaye saare baavafaa baiThe
hashr kaa din hai abhii duur 'Khumar'
aap kyo.n zaahido.n me.n jaa baiThe
@@@@@@@@@@@@@@@@@@@@@@@@@@@@@@@@@@@@@@@@@@@
ha.Nsane vaale ab ek kaam kare.n
jashn giriyaa kaa ahatamaam kare.n
ham bhii kar le.n jo raushanii ghar me.n
phir a.ndhere kahaa.n qayaam kare.n
mujh ko maharuumii-e-nazaaraa qabuul
aap jalave na aap ke aam kare.n
ik guzaarish hai hazarat-e-naaseh
aap ab aur ko_ii kaam kare.n
aa chale.n us ke dar pe ab ai dil
zindagii kaa safar tamaam kare.n
haath haTataa nahii.n hai dil se 'Khumaar'
ham unhe.n kis tarah salaam kare.n
@@@@@@@@@@@@@@@@@@@@@@@@@@@@@@@@@@@@@@@@@@@
hijr kii shab hai aur ujaalaa hai
kyaa tasavvur bhii luTane vaalaa hai
Gam to hai ain zindagii lekin
Gam_gusaaro.n ne maar Daalaa hai
ishq majabuur-o-naamuraad sahii
phir bhii zaalim kaa bol_baalaa hai
dekh kar barq kii pareshaanii
aashiyaa.n Khud hii phuu.Nk Daalaa hai
kitane ashko.n ko kitanii aaho.n ko
ik tabassum me.n us ne Dhaalaa hai
terii baato.n ko mai.n ne ai vaa_iz
ahataraamaa ha.Nsii me.n Taalaa hai
maut aaye to din phire shaayad
zindagii ne to maar Daalaa hai
sher nazme.n shaguftagii mastii
Gam kaa jo ruup hai niraalaa hai
laGziishe.n muskuraa_ii hai.n kyaa kyaa
hosh ne jab mujhe sambhaalaa hai
dam andhere me.n ghuT rahaa hai Khumaar
aur chaaro.n taraf ujaalaa hai
@@@@@@@@@@@@@@@@@@@@@@@@@@@@@@@@@@@@@@@@@@@
husn jab meharbaa.N ho to kyaa kiijiye
ishq kii maGfirat kii duaa kiijiye
is saliiqe se un se gilaa kiijiye
jab gilaa kijiye ha.Ns diyaa kiijiye
duusaro.n pe agar tabsiiraa kiijiye
saamane aa_iinaa rakh liyaa kiijiye
aap sukh se hai.n tark-e-ta'alluq ke baad
itanii jaldii na ye faisalaa kiijiye
ko_ii dhokhaa na khaa jaaye merii tarah
aise khul ke na sab se milaa kiijiye
aql-o-dil apanii apanii kahe.n jab 'Khumar'
aql kii suniye dil kaa kahaa kiijiye
@@@@@@@@@@@@@@@@@@@@@@@@@@@@@@@@@@@@@@@@@@@
kabhii jo mai.n ne masarrat kaa ehatamaam kiyaa
ba.De Tappak se Gam ne mujhe salaam kiyaa
hazaar tark-e-ta'alluq kaa ehatamaam kiyaa
magar jahaa.N vo mile dil ne apanaa kaam kiyaa
zamaane vaalo.n ke Dar se uThaa na haath magar
nazar se us ne basad maazarat salaam kiyaa
kabhii ha.Nse kabhii aahe.n bharii.n kabhii roye
baqadr-e-martabaa har Gam kaa ehataraam kiyaa
hamaare hisse kii may kaam aaye pyaaso.n ke
zer-e-raah-e-Khair gunaah shikast-e-jaam kiyaa
tuluu-e-mahar se bhii ghar ki tiiragii na ghaTii
ek aur shab kaTii yaa mai.n ne din tamaam kiyaa
duaa ye hai ke na huu.N gum_raah ham_safar mere
'Khumar' mai.n ne to apanaa safar tamaan kiyaa
@@@@@@@@@@@@@@@@@@@@@@@@@@@@@@@@@@@@@@@@@@@
kyaa huaa husn ham_safar hai yaa nahii.n
ishq manzil hii manzil hai raastaa nahii.n
Gam chhupaane se chhup jaaye aisaa nahii.n
beKhabar tuu ne aa_iinaa dekhaa nahii.n
do parinde u.De aa.Nkh nam ho ga_ii
aaj samajhaa ke mai.n tujh ko bhuulaa nahii.n
ahal-e-manzil abhii se na mujh par ha.Nso
paao.N TuuTe hai.n dil meraa TuuTaa nahii.n
tark-e-may ko abhii din hii kitane huye
aur kuchh kahaa may ko zaahid to achchhaa nahii.n
chho.D bhii de ab meraa saath ai zindagii
mujh ko nadaamat hai tujh se shikvaa nahii.n
tuune taubaa to kar lii magar ai 'Khumar'
tujh ko rahamat par shaayad bharosaa nahii.n
@@@@@@@@@@@@@@@@@@@@@@@@@@@@@@@@@@@@@@@@@@@
mujh ko shikast-e-dil kaa mazaa yaad aa gayaa
tum kyo.n udaas ho kyaa yaad aa gayaa
kahane ko zindagii thii bahut muKhtasar magar
kuchh yuu.N basar huii ke Khudaa yaad aa gayaa
vaa_iz salaam le ke chalaa maikade ko mai.n
firdaus-e-gum_shudaa kaa pataa yaad aa gaya
barase baGair hii jo ghaTaa ghir ke khul ga_ii
ek bevafaa kaa ahd-e-vafaa yaad aa gayaa
maa.Nge.nge ab duaa ke use bhuul jaaye.n ham
lekin jo vo bevaqt-e-duaa yaad aa gayaa
hairat hai tum ko dekh ke masjid me.n ai 'Khumar'
kyaa baat ho ga_ii jo Khudaa yaad aa gayaa
@@@@@@@@@@@@@@@@@@@@@@@@@@@@@@@@@@@@@@@@@@@
na haaraa hai ishq na duniyaa thakii hai
diyaa jal rahaa hai havaa chal rahii hai
sukuun hii sukuun hai Khushii hii Khushii hai
teraa Gam salaamat mujhe kyaa kamii hai
charaaGo.n ke badale makaa.N jal rahe hai.n
nayaa hai zamaanaa na_ii raushanii hai
are o jafaao.n pe chup rahane vaalo
Khaamoshii jafaao.n kii taa_iid bhii hai
mere rah_bar mujh ko gum_raah kar de
sunaa hai ki manzil qariib aa ga_ii hai
'Khumar' ek baalaanosh tuu aur taubaa
tujhe zaahido.n kii nazar lag ga_ii hai
@@@@@@@@@@@@@@@@@@@@@@@@@@@@@@@@@@@@@@@@@@@
tasviir banaataa huu.N tasviir nahii.n banatii
ek khvaab saa dekhaa hai taabiir nahii.n banatii
bedard muhabbat kaa itanaa saa hai afasaanaa
nazaro.n se milii nazare.n mai.n ho gayaa diivaanaa
ab dil ke bahalane kii tadabiir nahii.n banatii
dam bhar ke liye merii duniyaa me.n chale aao
tarasii huii aa.Nkho.n ko phir shaql dikhaa jaao
mujhase to merii biga.Dii taqadiir nahii.n banatii
@@@@@@@@@@@@@@@@@@@@@@@@@@@@@@@@@@@@@@@@@@@
vahii phir mujhe yaad aane lage hai.n
jinhe.n bhulaane me.n zamaane lage hai.n
vo hai.n paas aur yaad aane lage hai.n
muhabbat ke hosh ab Thikaane lage hai.n
sunaa hai hame.n vo bhulaane lage hai.n
to kyaa ham unhe.n yaad aane lage hai.n
haTaaye the jo raaste se dosto.n kii
vo patthar mere ghar me.n aane lage hai.n
ye kahanaa thaa un se muhabbat hai mujhako
ye kahane me.n mujh ko zamaane lage hai.n
qayaamat yaqiinan qariib aa rahii hai
'Khumar' ab to masjid me.n jaane lage hai.n
@@@@@@@@@@@@@@@@@@@@@@@@@@@@@@@@@@@@@@@@@@@
vo hame.n jis qadar aazamaate rahe
apanii hii mushkilo.n ko ba.Daate rahe
vo akele me.n bhii jo lagaate rahe
ho na ho un ko ham yaad aate rahe
yaad karane par bhii dost aaye na yaad
dosto.n ke karam yaad aate rahe
aa.Nkhe.n suukhii hu_ii nadiyaa.N ban ga_ii.n
aur tuufaan badsatuur aate rahe
pyaar se un kaa inkaar bar-haq magar
lab ye kyuu.N der tak thar-tharaate rahe
thii.n to kamaane.n haatho.n me.n aGyaar ke
tiir magar apano.n kii jaanib se aate rahe
kar liyaa sab ne ham se kinaaraa magar
ek naaseh Gariib aate jaate rahe
maikade se nikal kar janaab-e-'Khumar'
qaabaa-o-dair me.n Khaak u.Daate rahe @@@@@@@@@@@@@@@@@@@@@@@@@@@@@@@@@@@@@@@@@@@
vo savaa yaad aaye bhulaane ke baad
zindagii ba.Dh ga_ii zahar khaane ke baad
dil sulagataa rahaa aashiyaane ke baad
aag Tha.nDii hu_ii ik zamaane ke baad
raushanii ke liye ghar jalaanaa pa.Daa
kaisii zulmat ba.Dhii tere jaane ke baad
jab na kuchh ban pa.Daa arz-e-Gam kaa javaab
vo Khafaa ho gaye muskuraane ke baad
dushmano.n se pashemaaa.N honaa pa.Daa hai
dosto.n kaa Khuluus aazamaane ke baad
baKhsh de yaa rab ahal-e-havas ko bahisht
mujh ko kyaa chaahiye tum ko paane ke baad
kaise kaise gile yaad aaye 'Khumar'
un ke aane se qabl un ke jaane ke baad
@@@@@@@@@@@@@@@@@@@@@@@@@@@@@@@@@@@@@@@@@@@
No comments:
Post a Comment