aaj ai dil lab-o-ruKhsaar kii baate.n haii sahii
vaqt kaT jaayegaa kuchh pyaar kii baate.n hii sahii
yuu.N to kaTatii hii rahegii Gam-e-dauraa.N me.n hayaat
aaj kii raat Gam-e-yaar kii baate.n hii sahii
zindaa rahane kii kabhii to ko_ii suurat nikale
isharat-e-aalam-e-diidaar kii baate.n hii sahii
ko_ii to baat chhi.De aaj bahut jii hai udaas
kam se kam rahamat-e-aGyaar kii baate.n hii sahii
ab to tanhaa_ii ko ye karb na hogaa bardaasht
kuchh nahii.n to dar-o-diivaar kii baate.n hii sahii
ye bhii kyaa kam hai unhe.n qurbat-e-gul to hai nasiib
aaj gul kii na sahii Khaar kii baate.n hii sahii
ye to tai hai ki jiye jaaye.nge har haal me.n ham
un ke lab par rasan-o-daar kii baate.n hii sahii
@@@@@@@@@@@@@@@@@@@@@@@@@@@@@@@@@@@@@@@@@@@
ab bataao jaayegii zindagii kahaa.N yaaro
phir hai.n barq kii nazare.n suu-e-aashiyaa.N yaaro
ab na ko_ii manzil hai aur na rah_guzar ko_ii
jaane qaafilaa bhaTake ab kahaa.N kahaa.N yaaro
phuul hai.n ki laashe.n hai.n baaG hai ki maqtal hai
shaaKh shaaKh hotaa hai daar kaa gumaa.N yaaro
maut se guzar kar ye kaisii zindagii paa_ii
fikr paa-ba-jaulaa.N hai gung hai zabaa.N yaaroo
turbato.n kii shamaye.n hai.n aur gaharii Khaamoshii
jaa rahe the kis jaanib aa gaye kahaa.N yaaro
raahazan ke baare me.n aur kyaa kahuu.N khul kar
miir-e-kaaravaa.N yaaro miir-e-kaaravaa.N yaaro
sirf zindaa rahane ko zindagii nahii.n kahate
kuchh Gam-e-muhabbat ho kuchh Gam-e-jahaa.N yaaro
@@@@@@@@@@@@@@@@@@@@@@@@@@@@@@@@@@@@@@@@@@@
har qadam par nit naye saa.Nche me.n Dhal jaate hai.n log
dekhate hii dekhate kitane badal jaate hai.n log
kis liye kije kisii gum_gashtaa jannat kii talaash
jab ki miTTii ke khilone se bahal jaate hai.n log
kitane saadaa dil hai.n ab bhii sun ke aavaaz-e-jaras
pesh-o-pas se beKhabar ghar se nikal jaate hai.n log
shamaa kii maanind ahal-e-anjuman se beniyaaz
aksar apanii aag me.n chup-chaap jal jaate hai.n log
'Shayar' un kii dostii kaa ab bhii dam bharate hai.n aap
Thokare.n khaa kar to sunate hai.n sambhal jaate hai.n log
@@@@@@@@@@@@@@@@@@@@@@@@@@@@@@@@@@@@@@@@@@@
is baar vo milaa to ajiib us kaa rang thaa
alfaaz me.n tarang na lahajaa dabang tha
ek soch thii ki bikharii hu_ii Khaal-o-Khad me.n thii
ek dard thaa ki jis kaa shahiid ang-ang thaa
ek aag thii ki raakh me.n poshidaa thii kahii.n
ek jism thaa ki ruuh se masaruuf-e-jang thaa
mai.n ne kahaa ki yaar tumhe.n kyaa huaa hai ye
us ne kahaa ki umr-e-ravaa.N kii ataa hai ye
mai.n ne kahaa ki umr-e-ravaa.N to sabhii kii hai
us ne kahaa ki fikr-o-nazar kii ataa hai ye
mai.n ne kahaa ki sochataa rahata to mai.n bhii huu.N
us ne kahaa ki aa_iinaa rakhaa huaa hai ye
dekhaa to meraa apanaa hii aks-e-jamaal thaa vo
vo mai.n thaa aur "Himayat Ali" thaa vo
@@@@@@@@@@@@@@@@@@@@@@@@@@@@@@@@@@@@@@@@@@@
mai.n kaun huu.N kyaa huu.N merii tahariir kahegiiKhaamosh huaa to merii tasviir kahegii
kyuu.N surKh hai.n naqsh-e-kaf-e-paa raah-e-talab me.n
ko_ii na kahe paaon kii zanjiir kahegii
ham ko to sadaa niind me.n chalane kaa maraz hai
pahu.Nche.nge kahaa.N Khvaab kii taabiir kahegii
@@@@@@@@@@@@@@@@@@@@@@@@@@@@@@@@@@@@@@@@@@@
mai.n so rahaa thaa aur ko_ii bedaar mujh me.n thaa
shaayad abhii talak meraa pindaar mujh me.n thaa
vo kaj_adaa sahii merii pahachaan bhii thaa vo
apane nashe me.n mast jo fan_kaar mujh me.n thaa
mai.n Khud ko bhuulataa bhii to kis tarah bhuulataa
ik shaKhs thaa ki aa_iinaa bar_daar mujh me.n thaa
shaayad usii sabab se tavaazun-saa mujh me.n hai
ik muhatasib liye hue talavaar mujh me.n thaa
apanii kisii amal pe nidaamat nahii.n mujhe
thaa nek dil bahut jo gunaah_gaar mujh me.n thaa
@@@@@@@@@@@@@@@@@@@@@@@@@@@@@@@@@@@@@@@@@@@
paao.n ke zaKhm hai.n farsh-e-gul-e-tar hone tak
raah dushvaar hai aaGaaz-e-safar hone tak
ye alag baat ke Khaamosh hai.n ahal-e-zindaa.N
varnaa ye qaid hai diivaar me.n dar hone tak
ek nazar naqsh-e-kaf-e-paa kaa hunar to dekho
kahkashaa.N sii nazar aatii hai sahar hone tak
haaye vo biij jo miTTii me.n dabaa rahataa hai
kin maraahil se guzarataa hai shajar hone tak
kyaa Khabar tum ko ki ye saqf ye diivaar hai.n kyaa
ham pe kyaa guzarii hai is chhaao.n ke ghar hone tak
@@@@@@@@@@@@@@@@@@@@@@@@@@@@@@@@@@@@@@@@@@@
raat sun_saan dasht-o-dar Khaamosh
chaa.Nd sitaare shajar hajar Khaamosh
ko_ii aavaaz-e-paa na baang-e-jaras
kaaravaa.N aur is qadar Khaamosh
har taraf ek muhiib sannaaTaa
dil dha.Dakataa to hai magar Khaamosh
huye jaate hai.n kis liye aaKhir
ham_safar baat baat par Khaamosh
hai.n ye aadaab-e-rah_guzar ke Kahuf
raah_rau chup hai.n raahabar Khaamosh
muKhtasar ho na ho shab-e-taariik
ham ko jalanaa hai raat bhar Khaamosh
jaane kyaa baat kar rahe the ki ham
ho gaye ek naam par Khaamosh
@@@@@@@@@@@@@@@@@@@@@@@@@@@@@@@@@@@@@@@@@@@
ye aarazuu hai ki jab bhii gale lagaa_uu.N use
hisaar-e-zaat se baahar nikaal laa_uu.N use
vo jal rahaa thaa ka.Dii dhuup kii tamaazat me.n
milaa jo ab to o.Dhaa duu.Ngaa apanii chaa.Nv use
ye ishq bhii hai ajab imtihaan-e-ahad-e-vafaa
vo aazamaaye mujhe aur mai.n aazamaa_uu.N use
vo shahar shahar chiraaGaa.N sahii magar ek din
havaaye.n yaad dilaaye.ngii apanaa gaa.Nv use
vo apane Khvaab me.n shaayad mujhii ko dekhataa ho
mai.n tashnaa_lab sahii sote me.n kyaa jagaa_uu.N use
@@@@@@@@@@@@@@@@@@@@@@@@@@@@@@@@@@@@@@@@@@@
ye aarazuu hii rahii ko_ii aarazuu karate
Khud apanii aag me.n jalate jigar lahuu karate
tere jamaal kaa paratau nigaah me.n hotaa
kabhii sabaa se kabhii gul se guftaguu karate
tere Khayaal me.n gum hoke ek Gazal kahate
aur us Gazal ko na rusvaa kuu-ba-kuu karate
ham ahal-e-dil ko bahut thaa ye nashshaa-e-Gam bhii
usii sharaab se raushan subuu-subuu karate
ye ehataraam-e-junuu.N hai ki sii liyaa daaman
vagarnaa ek tamaashaa-saa kuu-ba-kuu karate
hame.n yaqii.n hai ki gar tuu qariib bhii hotaa
to duur jaake kahii.n terii justajuu karate
@@@@@@@@@@@@@@@@@@@@@@@@@@@@@@@@@@@@@@@@@@@
No comments:
Post a Comment