Jan Nissar Akhtar

ashaar mere yuu.N to zamaane ke liye hai.n
kuchh sher faqat unako sunaane ke liye hai.n 

ab ye bhii nahii.n Thiik ki har dard miTaa de.n
kuchh dard kaleje se lagaane ke liye hai.n 

aa.Nkho.n me.n jo bhar loge to kaa.nTo.n se chubhe.nge
ye Khvaab to palako.n pe sajaane ke liye hai.n 

dekhuu.N tere haatho.n ko to lagataa hai tere haath
ma.ndir me.n faqat diip jalaane ke liye hai.n 

socho to ba.Dii chiiz hai tahaziib badan kii
varanaa to badan aag bujhaane ke liye hai.n 

ye ilm kaa saudaa ye risaale ye kitaabe.n
ik shaKhs kii yaado.n ko bhulaane ke liye hai.n

@@@@@@@@@@@@@@@@@@@@@@@@@@@@@@@@@@@@@@@@@@@

fursat-e-kaar faqat chaar gha.Dii hai yaaro
ye na socho ke abhii umr pa.Dii hai yaaro 

apane taariik makaano.n se to baahar jhaa.Nko
zindagii shammaa liye dar pe kha.Dii hai yaaro 

unake bin jii ke dikhaa de.nge chalo yuu.N hii sahii
baat itanii sii hai ke zid aan pa.Dii hai yaaro 

faasalaa cha.nd qadam kaa hai manaa le.n chal kar
subah aa_ii hai magar duur kha.Dii hai yaaro 

kis kii dahaliiz pe le jaake sajaauu.N is ko
biich raste me.n ko_ii laash pa.Dii hai yaaro 

jab bhii chaahe.nge zamaane ko badal Daale.nge
sirf kahane ke liye baat ba.Dii hai yaaro

@@@@@@@@@@@@@@@@@@@@@@@@@@@@@@@@@@@@@@@@@@@

ham se bhaagaa na karo duur Gazaalo.n kii tarah
hamane chaahaa hai tumhe.n chaahane vaalo.n kii tarah 

Khud-ba-Khud nii.nd-sii aa.Nkho.n me.n ghulii jaatii hai
mahakii mahakii hai shab-e-Gam tere baalo.n kii tarah 

aur kyaa is se zyaadaa ko_ii narmii baratuu.N
dil ke zaKhmo.n ko chhuaa hai tere gaalo.n kii tarah 

aur to mujh ko milaa kyaa merii mehanat kaa silaa
cha.nd sikke hai.n mere haath me.n chhaalo.n kii tarah 

zindagii jis ko teraa pyaar milaa vo jaane
ham to naakaam rahe chaahane vaalo.n kii tarah

@@@@@@@@@@@@@@@@@@@@@@@@@@@@@@@@@@@@@@@@@@@

har ek ruuh me.n ek Gam chhupaa lage hai mujhe
ye zindagii to ko_ii bad-duaa lage hai mujhe 

jo aa.Nsuu me.n kabhii raat bhiig jatii hai
bahut qariib vo aavaaz-e-paa lage hai mujhe 

mai.n so bhii jaauu.N to merii ba.nd aa.Nkho.n me.n
tamaam raat ko_ii jhaa.Nkataa lage hai mujhe 

mai.n jab bhii us ke Khayaalo.n me.n kho saa jaataa huu.N
vo Khud bhii baat kare to buraa lage hai mujhe 

mai.n sochataa thaa ki lauTuu.Ngaa ajanabii kii tarah
ye meraa gaao.N to pahachaanaa saa lage hai mujhe 

bikhar gayaa hai kuchh is tarah aadamii kaa vajuud
har ek fard ko_ii saanehaa lage hai mujhe

@@@@@@@@@@@@@@@@@@@@@@@@@@@@@@@@@@@@@@@@@@@

jab lage zaKhm to qaatil ko duaa dii jaaye

hai yahii rasm to ye rasm uThaa dii jaaye

tishnagii kuchh to bujhe tishnaalab-e-Gam kii

ik nadii dard ke shaharo.n me.n bahaa dii jaaye

dil kaa vo haal huaa ai Gam-e-dauraa.N ke tale

jaise ik laash chaTTaano.n me.n dabaa dii jaaye

ham ne insaano.n ke dukh dard kaa hal Dhuu.NDh liyaa

kyaa buraa hai jo ye afvaa u.Daa dii jaaye

ham ko guzarii hu_ii sadiyaa.N to na pahachaane.ngii

aane vaale kisii lamhe ko sadaa dii jaaye

phuul ban jaatii hai.n dahake hue sholo.n kii lave.n

shart ye hai ke unhe.n Khuub havaa dii jaaye

kam nahii.n nashe me.n jaa.De kii gulaabii raate.n

aur agar terii javaanii bhii milaa dii jaaye

ham se puuchho Gazal kyaa hai Gazal kaa fan kyaa hai

chand lafzo.n me.n ko_ii aah chhupaa dii jaaye

@@@@@@@@@@@@@@@@@@@@@@@@@@@@@@@@@@@@@@@@@@@

kaun kahataa hai tujhe mai.n ne bhulaa rakhaa hai
terii yaado.n ko kaleje se lagaa rakhaa hai 

lab pe aahe.n bhii nahii.n aa.Nkh me.n aa.Nsuu bhii nahii.n
dil ne har raaz muhabbat kaa chhupaa rakhaa hai 

tuune jo dil ke a.ndhere me.n jalaayaa thaa kabhii
vo diyaa aaj bhii siine me.n jalaa rakhaa hai 

dekh jaa aake mahakate huye zaKhmo.n kii bahaar
mai.n ne ab tak tere gulashan ko sajaa rakhaa hai

@@@@@@@@@@@@@@@@@@@@@@@@@@@@@@@@@@@@@@@@@@@

mauj-e-gul, mauj-e-sabaa, mauj-e-sahar lagatii hai
sar se paa tak vo samaa.N hai ki nazar lagatii hai 

hamane har gaam sajdo.n e jalaaye hai.n chiraaG
ab terii raahaguzar raahaguzar lagatii hai 

lamhe lamhe basii hai terii yaado.n kii mahak
aaj kii raat to Khushbuu kaa safar lagatii hai 

jal gayaa apanaa nasheman to koii baat nahii.n
dekhanaa ye hai ki ab aag kidhar lagatii hai 

saarii duniyaa me.n Gariibo.n kaa lahuu bahataa hai
har zamii.n mujhako mere Khuun se tar lagatii hai 

vaaqyaa shahar me.n kal to koii aisaa na huaa
ye to "Akhtar" ke daftar kii Khabar lagatii hai

@@@@@@@@@@@@@@@@@@@@@@@@@@@@@@@@@@@@@@@@@@@

puuchh na mujhase dil ke fasaane
ishq kii baate.n ishq hii jaane

vo din jab ham un se mile the
dil ke naazuk phuul khile
mastii aa.Nkhe.n chuum rahii thii
saarii duniyaa jhuum rahii
do dil the vo bhii diivaane

vo din jab ham duur huye the
dil ke shiishe chuur huye the
aa_ii Khizaa.N rangiin chaman me.n
aag lagii jab dil ke ban me.n
aayaa na ko_ii aag bujhaane

@@@@@@@@@@@@@@@@@@@@@@@@@@@@@@@@@@@@@@@@@@@

rahii hai daad talab unakii shoKhiyaa.N hamase
adaa shanaas to bahut hai.n magar kahaa.N hamase 

sunaa diye the kabhii kuchh galat-salat qisse
vo aaj tak hai.n usii tarah badagumaa.N hamase 

ye ku.nj kyuu.N naa ziaarat gahe muhabbat ho
mile the vo i.nhii.n pe.Do.n ke darmiyaa.N hamase 

hamii.n ko fursat-e-nazzaaragii nahii.n varanaa
ishaare aaj bhii karatii hai.n khi.Dakiyaa.N hamase 

har ek raat nashe me.n tere badan kaa Khayaal
naa jaane TuuT gaii kai suraahiyaa.N hamase

@@@@@@@@@@@@@@@@@@@@@@@@@@@@@@@@@@@@@@@@@@@

sau chaa.Nd bhii chamake.nge to kyaa baat banegii
tum aaye to is raat kii auqaat banegii 

un se yahii kah aaye ki ham ab na mile.nge
aaKhir ko_ii taqariib-e-mulaaqaat banegii 

ye ham se na hogaa ki kisii ek ko chaahe.n
ai ishq! hamaarii na tere saath banegii 

hairat kadaa-e-husn kahaa.N hai abhii duniyaa
kuchh aur nikhar le to tilismaat banegii 

ye kyaa ke ba.Dhate chalo ba.Dhate chalo aage
jab baiTh ke soche.nge to kuchh baat banegii

@@@@@@@@@@@@@@@@@@@@@@@@@@@@@@@@@@@@@@@@@@@

sub_h ke dard ko raato.n kii jalan ko bhuule.n
kisake ghar jaaye.N ki us vaadaa-shikan ko bhuule.n 

aaj tak choT dabaaye nahii.n dabatii dil kii
kis tarah us sanam-e-sang_badan ko bhuule.n 

ab sivaa isake madaavaa-e-Gam-e-dil kyaa hai
itanii pii jaaye.N ki har ra.nj-o-mehan ko bhuule.n 

aur tahaziib-e-gam-e-ishq nibaah de kuchh din
aaKhirii vaqt me.n kyaa apane chalan ko bhuule.n

@@@@@@@@@@@@@@@@@@@@@@@@@@@@@@@@@@@@@@@@@@@

subah kii aas kisii lamhe jo ghaT jaatii hai
zindagii saham ke Khvaabo.n se lipaT jaatii hai 

shaam Dhalate hii teraa dard chamak uThataa hai
tiiragii duur talak raat kii chhaT jaatii hai 

barf siino.n kii na pighale to yahii ruud-e-hayaat
juu-e-kam-aab kii maani.nd simaT jaatii hai 

aahaTe.n kaun sii Khvaabo.n me.n basii hai jaane
aaj bhii raat gaye nii.nd uchaT jaatii hai 

haa.N Khabar-daar ki ik laGzish-e-paa se bhii kabhii
saarii taariiKh kii raftaar palaT jaatii hai

@@@@@@@@@@@@@@@@@@@@@@@@@@@@@@@@@@@@@@@@@@@

tamaan umr azaabo.n kaa silasilaa to rahaa
ye kam nahii.n hame.n jiine kaa hausalaa to rahaa 

guzar hii aaye kisii tarah tere diivaane
qadam qaadam pe koii saKht marhalaa to rahaa 

chalo na ishq hii jiitaa na aql haar sakii
tamaam vaqt maze kaa muqaabalaa to rahaa 

mai.n terii zaat me.n gum ho sakaa na tuu mujh me.n
bahut qariib the ham phir bhii faasalaa to rahaa 

ye aur baat ki har chhe.D laa_ubaalii thii
terii nazar kaa dilo.n se mu_aamalaa to rahaa 

bahut hasii.n sahii wazae-ehatiyaat terii
merii havas ko tere pyaar se gilaa to rahaa

@@@@@@@@@@@@@@@@@@@@@@@@@@@@@@@@@@@@@@@@@@@

zamaanaa aaj nahii.n Dagamagaa ke chalane kaa
sambhal bhii jaa ki abhii vaqt hai sambhalane kaa 

bahaar aaye chalii jaaye phir chalii aaye
magar ye dard kaa mausam nahii.n badalane kaa 

ye Thiik hai ki sitaaro.n pe ghuum aaye hai.n
magar kise hai saliqaa zamii.n pe chalane kaa 

phire hai.n raato.n ko aavaaraa ham to dekhaa hai
galii galii me.n samaa.N chaa.Nd ke nikalane kaa 

tamaam nashaa-e-hastii tamaam kaif-e-vajuud
vo ik lamhaa tere jism ke pighalane kaa

@@@@@@@@@@@@@@@@@@@@@@@@@@@@@@@@@@@@@@@@@@@

zaraa sii baat pe har rasm to.D aayaa thaa

dil-e-tabaah ne bhii kyaa mizaaj paayaa thaa

muaaf kar naa sakii merii zindagii mujh ko

vo ek lamhaa ki mai.n tujh se tang aayaa thaa

shaguftaa phuul simaT kar kalii bane jaise

kuchh is tarah se tuune badan churaayaa thaa

guzar gayaa hai ko_ii lamhaa-e-sharar kii tarah

abhii to mai.n use pahachaan bhii na paayaa thaa

pataa nahii.n ki mere baad un pe kyaa guzarii

mai.n chand Khvaab zamaane me.n chho.D aayaa thaa

@@@@@@@@@@@@@@@@@@@@@@@@@@@@@@@@@@@@@@@@@@@