Kaifi Azmi

ik yahii soz-e-nihaa.N kul meraa sarmaayaa hai

dosto mai.n kise ye soz-e-nihaa.N nazr karuu.N

ko_ii qaatil sar-e-maqtal nazar aataa hii nahii.n

kis ko dil nazr karuu.N aur kise jaa.N nazr karuu.N?

tum bhii mahaboob mere tum bhii ho dil_daar mere

aashnaa mujh se magar tum bhii nahii.n tum bhii nahii.n

Khatm hai tum pe masiihaa_nafasii chaaraagarii

meharam-e-dard-e-jigar tum bhii nahii.n tum bhii nahii.n

apanii laash aap uThaanaa ko_ii aasaan nahii.n

dast-o-baazuu mere naakaaraa hue jaate hai.n

jin se har daur me.n chamakii hai tumhaarii dahaliiz

aaj sajde vohii aavaaraa hue jaate hai.N

duur manzil thii magar aisii bhii kuchh duur na thii

leke phiratii rahii raste hii me.n vahashat mujh ko

ek zaKhm aisaa na khaayaa ke bahaar aa jaatii

daar tak leke gayaa shauq-e-shahaadat mujh ko

raah me.n TuuT gaye paa.Nv to maaluum huaa

juz mere aur meraa rah_numaa ko_ii nahii.n

ek ke baad Khudaa ek chalaa aataa thaa

kah diyaa aql ne tang aake 'Khudaa ko_ii nahii.n'

@@@@@@@@@@@@@@@@@@@@@@@@@@@@@@@@@@@@@@@@@@@

ruuh bechain hai ik dil kii aziiyat kyaa hai

dil hii sholaa hai to ye soz-e-mohabbat kyaa hai

vo mujhe bhuul ga_ii iskii shikaayat kyaa hai

ranj to ye hai ke ro-roke bhulaayaa hogaa

vo kahaa.N aur kahaa.N kaahif-e-Gam sozish-e-jaa.N

us kii rangiin nazar aur nuquush-e-hirmaa.N

us kaa ehsaas-e-latiif aur shikast-e-armaa.N

taanaazan ek zamaanaa nazar aayaa hogaa

jhuk ga_ii hogii javaa.N-saal umango.n kii jabii.n

miT ga_ii hogii lalak Duub gayaa hogaa yaqii.n

chhaa gayaa hogaa dhuaa.N ghuum ga_ii hogii zamii.n

apane pahale hii gharonde ko jo Dhaayaa hogaa

dil ne aise bhii kuchh afsaane sunaaye ho.Nge

ashk aa.Nkho.n ne piye aur na bahaaye ho.Nge

band kamare me.n jo Khat mere jalaaye ho.Nge

ek-ik harf jabii.n par ubhar aayaa hogaa

us ne ghabaraake nazar laakh bachaa_ii hogii

miTake ik naqsh ne sau shaql dikhaa_ii hogii

mez se jab merii tasviir haTaa_ii hogii

har taraf mujh ko ta.Daptaa huaa paayaa hogaa

bemahal chhe.D pe jazbaat ubal aaye ho.Nge

Gam pashemaan tabassum me.n Dhal aaye ho.Nge

naam par mere jab aa.Nsuu nikal aaye ho.Nge

sar na kaa.Ndhe se sahalii ke uThaayaa hogaa

zulf zid kar ke kisii ne jo banaa_ii hogii

ruuThw jalvo.N pe Khizaa.N aur bhii chhaa_ii hogii

barq ashvo.N ne ka_ii din na giraa_ii hogii

rang chehare pe ka_ii roz na aayaa hogaa

hoke majabuur mujhe us ne bhulaayaa hogaa

zahar chup kar ke davaa jaan ke Khaayaa hogaa

@@@@@@@@@@@@@@@@@@@@@@@@@@@@@@@@@@@@@@@@@@@

ab tum aaGosh-e-tasavvur me.n bhii aayaa na karo

mujh se bikhare huye gesuu nahii.n dekhe jaate

surKh aa.Nkho.n kii qasam kaa.Npatii palako.n kii qasam

thar-tharaate huye aa.Nsuu nahii.n dekhe jaate

ab tum aaGosh-e-tasavvur me.n bhii aayaa na karo

chhuuT jaane do jo daaman-e-vafaa chhuuT gayaa

kyuu.N ye laGaziidaa Kharaamii ye pashemaa.N nazarii

tum ne to.Daa nahii.n rishtaa-e-dil TuuT gayaa

ab tum aaGosh-e-tasavvur me.n bhii aayaa na karo

merii aaho.n se ye ruKhsaar na kumalaa jaaye.n

Dhuu.NDatii hogii tumhe.n ras me.n nahaa_ii hu_ii raat

jaao kaliyaa.N na kahii.n sej kii murjhaa jaaye.n

ab tum aaGosh-e-tasavvur me.n bhii aayaa na karo

mai.n is uja.De huye pahaluu me.n biThaa luu.N na kahii.n

lab-e-shiirii.n kaa namak aariz-e-namakii.n kii miThaas

apane tarase huye ho.nTho.n me.n churaa luu.N na kahii.n

@@@@@@@@@@@@@@@@@@@@@@@@@@@@@@@@@@@@@@@@@@@

azaa me.n bahate the aa.Nsuu yahaa.N, lahuu to nahii.n

ye ko_ii aur jagah hai ye lakhanauu to nahii.n

yahaa.N to chalatii hai.n chhuriyaa zubaa.N se pahale

ye miir aniis kii, aatish kii guftaguu to nahii.n

chamak rahaa hai jo daaman pe dono.n firaqo.n ke

baGaur dekho ye isalaam kaa lahuu to nahii.n

@@@@@@@@@@@@@@@@@@@@@@@@@@@@@@@@@@@@@@@@@@@

bas ik jhijhak hai yahii haal-e-dil sunaane me.n

ki teraa zikr bhii aayegaa is fasaane me.n

baras pa.Dii thii jo ruKh se naqaab uThaane me.n

vo chaa.Ndanii hai abhii tak mere Gariib-Khaane me.n

isii me.n ishq kii qismat badal bhii sakatii thii

jo vaqt biit gayaa mujh ko aazamaane me.n

ye kah ke TuuT pa.Daa shaaKh-e-gul se aaKhirii phuul

ab aur der hai kitanii bahaar aane me.n

@@@@@@@@@@@@@@@@@@@@@@@@@@@@@@@@@@@@@@@@@@@

roz ba.Dhataa huu.N jahaa.N se aage

phir vahii.n lauT ke aa jaataa huu.N

baarahaa to.D chukaa huu.N jin ko

i.nhii.n diivaaro.n se Takaraataa huu.N

roz basate hai.n ka_ii shahar naye

roz dharatii me.n samaa jaate hai.n

zal-zalo.n me.n thii zaraa sii girah

vo bhii ab roz hii aa jaate hai.n

jism se ruuh talak ret hii ret

na kahii.n dhuup na saayaa na saraab

kitane aramaa.N hai kis seharaa me.n

kaun rakhataa hai mazaaro.n kaa hisaab

nafz bujhatii bhii bha.Dakatii bhii hai

dil kaa maamuul hai ghabaraanaa bhii

raat a.Ndhere ne a.Ndhere se kahaa

ik aadat hai jiye jaanaa bhii

qaus ek rang kii hotii hai tuluu'a

ek hii chaal bhii paimaanaa bhii

goshe goshe me.n kha.Dii hai masjid

mushkil kyaa ho ga_ii mayaKhaane kii

ko_ii kahataa thaa sama.ndar huu.N mai.n

aur merii jeb me.n qataraa bhii nahii.n

Khairiyat apanii likhaa karataa huu.N

ab to taqadiir me.n Khataraa bhii nahii.n

apane haatho.n ko pa.Dhaa karataa huu.N

kabhii quraan kabhii giitaa kii tarah

cha.nd rekhaao.n me.n samaauu.N mai.n

zindagii qaid hai siitaa kii tarah

raam kab lauTe.nge maaluum nahii.n

kaash raavan hii ko_ii aa jaataa

@@@@@@@@@@@@@@@@@@@@@@@@@@@@@@@@@@@@@@@@@@@

ab aur kyaa teraa biimaar baap degaa tujhe

bas ek duaa ki Khudaa tujhako kaamayaab kare

vo Taa.Nk de tere aa.Nchal me.n chaa.Nd aur taare

tuu apane vaaste jis ko bhii intaKhaab kare

@@@@@@@@@@@@@@@@@@@@@@@@@@@@@@@@@@@@@@@@@@@

itanaa to zindagiii me.n kisii kii Khalal pa.De

ha.Nsane se ho sukuun naa rone se kal pa.De

jis tarah ha.Ns rahaa huu.N mai.n pii-pii ke ashk-e-Gam

yuu.N duusaraa ha.Nse to kalejaa nikal pa.De

ek tum ke tum ko fikr-e-nasheb-o-faraaz hai

ek ham ke chal pa.De to baharahaal chal pa.De

muddat ke baad us ne jo kii lutf kii nigaah

jii Khush to ho gayaa magar aa.Nsuu nikal pa.De

saaqii sabhii ko hai Gam-e-tashnaalabii magar

may hai usii ke naam pe jis ke ubal pa.De

@@@@@@@@@@@@@@@@@@@@@@@@@@@@@@@@@@@@@@@@@@@

jhukii jhukii sii nazar beqaraar hai ki nahii.n

dabaa dabaa saa sahii dil me.n pyaar hai ki nahii.n

tuu apane dil kii javaa.N dha.Dakano.n ko gin ke bataa

merii tarah teraa dil beqaraar hai ki nahii.n

vo pal ke jis me.n muhabbat javaan hotii hai

us ek pal kaa tujhe i.ntazaar hai ki nahii.n

terii ummiid pe Thukaraa rahaa huu.N duniyaa ko

tujhe bhii apane pe ye aitabaar hai ki nahii.n

@@@@@@@@@@@@@@@@@@@@@@@@@@@@@@@@@@@@@@@@@@@

koii ye kaise bataa ye ke vo tanhaa kyo.n hai.n

vo jo apanaa thaa vohii aur kisii kaa kyo.n hai.n

yahii duniyaa hai to phir aisii ye duniyaa kyo.n hai.n

yahii hotaa hai.n to aakhir yahii hotaa kyo.n hai.n

ek zaraa haath ba.Dhaa, de to paka.Dale daaman

usake siine me.n samaa jaaye hamaarii dha.Dakan

itanii qurbat hai.n to phir faasalaa itanaa kyo.n hai.n

dil-e-barabaad se nikalaa nahii.n ab tak koii

ek luTe ghar pe diyaa karataa hai.n dastak koii

aas jo TuuT gayii phir se ba.ndhaataa kyo.n hai.n

tum masarrat kaa kaho yaa ise Gam kaa rishtaa

kahate hai.n pyaar kaa rishtaa hai.n janam kaa rishtaa

hai.n janam kaa jo ye rishtaa to badalataa kyo.n hai.n

@@@@@@@@@@@@@@@@@@@@@@@@@@@@@@@@@@@@@@@@@@@

mai.n Dhuu.NDhataa huu.N jise vo jahaa.N nahii.n milataa

na_ii zamii.n nayaa aasamaa.N nahii.n milataa

na_ii zamii.n nayaa aasamaa.N bhii mil jaaye

naye bashar kaa kahii.n kuchh nishaa.N nahii.n milataa

vo teG mil ga_ii jis se huaa hai qatl meraa

kisii ke haath kaa us par nishaa.N nahii.n milataa

vo meraa gaa.Nv hai vo mere gaa.Nv ke chuulhe

ki jin me.n shole to shole dhuaa.N nahii.n milataa

jo ik Khudaa nahii.n milataa to itanaa maatam kyuu.N

yahaa.N to ko_ii meraa hamazabaa.N nahii.n milataa

kha.Daa huu.N kab se mai.n cheharo.n ke ek ja.ngal me.n

tumhaare chehare kaa kuchh bhii yahaa.N nahii.n milataa

@@@@@@@@@@@@@@@@@@@@@@@@@@@@@@@@@@@@@@@@@@@

aaj kii raat bahut garm havaa chalatii hai

aaj kii raat na fut-paath pe niind aa_egii

sab uTho, mai.n bii uThuu.N, tum bhii uTho, tum bhii uTho

ko_ii khi.Dakii isii diivaar me.n khul jaa_egii

ye zamiin tab bhii nigal lene pe aamaadaa thii

paa.Nv jab TuuTii shaaKho.n se utaare ham ne

in makaano.n ko Khabar hai na makiino.n ko Khabar

un dino.n kii jo gufaao.n me.n guzaare ham ne

haath Dhalate gaye saa.Nche me.n to thakate kaise

naqsh ke baad naye naqsh nikhaare ham ne

kii ye diivaar buland, aur buland, aur buland

baam-o-dar aur zaraa, aur sa.Nvaare ham ne

aa.Ndhiyaa.N to.D liyaa karatii thii.n shamo.n kii lau_e.n

ja.D diye is liye bijalii ke sitaare ham ne

ban gayaa qasr to pahare pe ko_ii baiTh gayaa

so rahe Khaak pe ham shorish-e-taamiir liye

@@@@@@@@@@@@@@@@@@@@@@@@@@@@@@@@@@@@@@@@@@@

mere dil me.n tuu hii tuu hai dil kii davaa kyaa karuu.N

dil bhii tuu hai jaa.N bhii tuu hai tujhape fidaa kyaa karuu.N

Khud ko khokar tujhako paa kar kyaa kyaa milaa kyaa kahuu.N

teraa hoke jiine me.n kyaa kyaa aayaa mazaa kyaa kahuu.N

kaise din hai.n kaisii raate.n kaisii fizaa kyaa kahuu.N

merii hoke tuune mujhako kyaa kyaa diyaa kyaa kahuu.N

merii pahaluu me.n jab tuu hai phir mai.n duaa kyaa karuu.N

dil bhii tuu hai jaa.N bhii tuu hai tujhape fidaa kyaa karuu.N

hai ye duniyaa dil kii duniyaa milake rahe.nge yahaa.N

luuTe.nge ham Khushiyaa.N har pal dukh na sahe.nge yahaa.N

armaano.n ke cha.nchal dhaare aise bahe.nge yahaa.N

ye to sapano.n kii jannat hai sab hii kahe.nge yahaa.N

ye duniyaa mere dil me.n basii hai dil se judaa kyaa karuu.N

dil bhii tuu hai jaa.N bhii tuu hai tujhape fidaa kyaa karuu.N

@@@@@@@@@@@@@@@@@@@@@@@@@@@@@@@@@@@@@@@@@@@

tum pareshaan na ho baab-e-karam vaa na karo

aur kuchh der pukaaruu.Ngaa chalaa jaauu.Ngaa

isii kuuche me.n jahaa.N chaa.Nd ugaa karate hai.n

shab-e-taariik guzaaruu.Ngaa chalaa jaauu.Ngaa

raastaa bhuul gayaa yaa yahaa.N manzil hai merii

ko_ii laayaa hai yaa Khud aayaa huu.N maaluum nahii.n

kahate hai.n husn ki nazare.n bhii hasii.n hotii hai.n

mai.n bhii kuchh laayaa huu.N kyaa laayaa huu.N maaluum nahii.n

yuu.N to jo kuchh thaa mere paas mai.n sab kuchh bech aayaa

kahii.n inaam milaa aur kahii.n qiimat bhii nahii.n

kuchh tumhaare liye aa.Nkho.n me.n chhupaa rakkhaa hai

dekh lo aur na dekho to shikaayat bhii nahii.n

ek to itanii hasii.n duusare ye aaraa_ish

jo nazar pa.Datii hai chehare pe Thahar jaatii hai

muskuraa detii ho rasaman bhii agar mahafil me.n

ik dhanak TuuT ke siino.n me.n bikhar jaatii hai

garm boso.n se taraashaa huaa naazuk paikar

jis kii ik aa.Nch se har ruuh pighal jaatii hai

mai.n ne sochaa hai to sab sochate ho.nge shaayad

pyaas is tarah bhii kyaa saa.Nche me.n Dhal jaatii hai

kyaa kamii hai jo karogii meraa nazaraanaa qubuul

chaahane vaale bahut chaah ke afsaane bahut

ek hii raat sahii garmii-e-hangaamaa-e-ishq

ek hii raat me.n jal marate hai.n paravaane bahut

phir bhii ik raat me.n sau tarah ke mo.D aate hai.n

kaash tum ko kabhii tanahaa_ii kaa ehasaas na ho

kaash aisaa na ho Gair-e-raah-e-duniyaa tum ko

aur is tarah ki jis tarah ko_ii paas na ho

aaj kii raat jo merii tarah tanhaa hai

mai.n kis tarah guzaaruu.Ngaa chalaa jaauu.Ngaa

tum pareshaa.N na ho baab-e-karam vaa na karo

aur kuchh der pukaaruu.Ngaa chalaa jaauu.Ngaa

ek rangiin jhijhak ek saadaa payaam

kaise bhuuluu.N kisii kaa vo pahalaa salaam

phuul ruKhsaar ke ras_masaane lage

haath uThaa qadam Dag_magaane lage

rang-saa Khaal-o-Khad se chhalakane lagaa

sar se rangiin aa.Nchal Dhalakane lagaa

ajanabiyat nigaahe.n churaane lagii

din dha.Dakane lagaa lahar aane lagii

saa.Ns me.n ik gulaabii girah pa.D ga_ii

ho.nTh tharraaye simaTe nazar ga.D ga_ii

rah gayaa umr bhar ke liye ye hijaab

kyo.n na sambhalaa huaa de sakaa mai.n javaab

kyo.n mai.n be-qasd be-azm be-vaastaa

duusarii samt ghabaraa ke takane lagaa

@@@@@@@@@@@@@@@@@@@@@@@@@@@@@@@@@@@@@@@@@@@

patthar ke Khudaa vahaa.N bhii paaye

ham chaa.Nd se aaj lauT aaye

diivaare.n to har taraf kha.Dii hai.n

kyaa ho gayaa meharabaa.N saaye

ja.ngal kii havaaye.N aa rahii hai.n

kaaGaz kaa ye shehar u.D na jaaye

lailaa ne nayaa janam liyaa hai

hai Qais koii jo dil lagaaye

hai aaj zamiin kaa gusal-e-sahat

jis dil me.n ho jitanaa Khuun laaye

seharaa seharaa lahuu ke Kheme

phir pyaase lab-e-furaat aaye

@@@@@@@@@@@@@@@@@@@@@@@@@@@@@@@@@@@@@@@@@@@

sunaa karo merii jaa.N in se un se afasaane

sab ajanabii hai.n yahaa.N kaun kis ko pahachaane

yahaa.N se jald guzar jaao qaafile vaalo.n

hai.n merii pyaas ke phuu.Nke hue ye viiraane

merii junuun-e-parastish se ta.ng aa gaye log

sunaa hai ba.nd kiye jaa rahe hai.n but-Khaane

jahaa.N se pichhale pahar ko_ii tashnaa-kaam uThaa

vahii.n pe to.De hai.n yaaro.n ne aaj paimaane

bahaar aaye to meraa salaam kah denaa

mujhe to aaj talab kar liyaa hai seharaa ne

sivaa hai huqm ki "Kaifi" ko sang-saar karo

masiihaa baiThe hai.n chhup ke kahaa.N Khudaa jaane

@@@@@@@@@@@@@@@@@@@@@@@@@@@@@@@@@@@@@@@@@@@

tum itanaa jo muskuraa rahe ho

kyaa Gam hai jis ko chhupaa rahe ho

aa.Nkho.n me.n namii ha.Nsii labo.n par

kyaa haal hai kyaa dikhaa rahe ho

ban jaaye.nge zahar piite piite

ye ashk jo piite jaa rahe ho

jin zaKhmo.n ko vaqt bhar chalaa hai

tum kyo.n unhe.n chhe.De jaa rahe ho

rekhaao.n kaa khel hai muqaddar

rekhaao.n se maat khaa rahe ho @@@@@@@@@@@@@@@@@@@@@@@@@@@@@@@@@@@@@@@@@@@

yahii tohafaa hai yahii nazaraanaa

mai.n jo aavaaraa nazar laayaa huu.N

rang me.n tere milaane ke liye

qataraa-e-Khuun-e-jigar laayaa huu.N

ai gulaabo.n ke vatan

pahale kab aayaa huu.N kuchh yaad nahii.n

lekin aayaa thaa qasam khaataa huu.N

phuul to phuul hai.n kaa.NTo.n pe tere

apane ho.NTo.n ke nishaa.N paataa huu.N

mere Khvaabo.n ke vatan

chuum lene de mujhe haath apane

jin se to.Dii hai.n ka_ii zanjiire.n

tuune badalaa hai mashiyat kaa mizaaj

tuune likhii hai.n na_ii taqdiire.n

inqalaabo.n ke vatan

phuul ke baad naye phuul khile.n

kabhii Khaalii na ho daaman teraa

roshanii roshanii terii raahe.n

chaa.Ndanii chaa.Ndanii aa.ngan teraa

maahataabo.n ke vatan

@@@@@@@@@@@@@@@@@@@@@@@@@@@@@@@@@@@@@@@@@@@