amn kaa jo paiGaam sunaane vaale hai.n
galiyo.n galiyo.n aag lagaane vaale hai.n
tum le jaao nezaa Khanjar aur talvaar
ham maqtal me.n sar le jaane vaale hai.n
zulm ke kaale baadal se Daranaa kaisaa
ye mausam to aane jaane vaale hai.n
biimaaro.n kaa ab to Khudaa hii haafiz hai
saare masiihaa zahar pilaane vaale hai.n
jaan bachaane vaale to sab hai.n lekin
ab kitane imaan bachaane vaale hai.n
ham ko un valiyo.n kii nisbat haasil hai
dasht ko jo gul_zaar banaane vaale hai.n
bhuukaa rah ke saa_il ko Khairaat jo de
ham bhii 'Majid' usii gharaane vaale hai.n
@@@@@@@@@@@@@@@@@@@@@@@@@@@@@@@@@@@@@@@@@@@
saaman-e-tijaarat meraa imaan nahii.n hai
har dar pe jhuke sar ye merii shaan nahii.n hai
har lafz ko siine me.n basaa lo to bane baat
taako.n me.n sajaane ko ye quraan nahii.n hai
allaah merii rizq kii barakat na chalii jaaye
do roz se ghar me.n ko_ii mahamaan nahii.n hai
ham ne to banaaye hai.n samandar me.n bhii raste
yuu.N ham ko miTaana ko_ii aasaan nahii.n hai
jis ko buzurgo.n kii rivaayat na rahe yaad
us shaKhs kii logo.n ko_ii pahachaan nahii.n hai
@@@@@@@@@@@@@@@@@@@@@@@@@@@@@@@@@@@@@@@@@@@
tumhe.n hai shauq agar bijaliyaa.N giraane kaa
hamaaraa kaam bhii hai aashiyaa.N banaane kaa
bhalaa vo kaise samandar ke paar utaregaa
nafas nafas jinhe.n Khadshaa hai Duub jaane kaa
sunaa hai aap hai.n maahir havaa chalaane me.n
magar hame.n bhii hunar hai diye jalaane kaa
@@@@@@@@@@@@@@@@@@@@@@@@@@@@@@@@@@@@@@@@@@@
No comments:
Post a Comment